Two Sri Lankan women found dead in Kuwait കുവൈത്ത് സിറ്റി, ഒക്ടോബർ 22: കുവൈത്തിലെ അലി സബ അൽ-സലേം, അൽ-നഹ്ദ പ്രദേശങ്ങളിൽ രണ്ട് ശ്രീലങ്കൻ സ്ത്രീകളെ മരിച്ച നിലയിൽ കണ്ടെത്തിയ സംഭവങ്ങളിൽ അധികൃതർ അന്വേഷണം ആരംഭിച്ചു. രണ്ട് മരണങ്ങളും സംശയാസ്പദമായ കേസുകളായി രജിസ്റ്റർ ചെയ്തിട്ടുണ്ട്.
ആദ്യ സംഭവത്തിൽ, അലി സബ അൽ-സലേമിലെ ഒരു വീടിന്റെ മേൽക്കൂരയിലുള്ള സ്റ്റോറേജ് മുറിയിൽ 1988ൽ ജനിച്ച ശ്രീലങ്കൻ സ്ത്രീയുടെ മൃതദേഹം കണ്ടെത്തി. കുവൈത്ത് പൗരനാണ് വിവരം അധികൃതരെ അറിയിച്ചത്.
തുടർന്ന് അഹമ്മദി പബ്ലിക് പ്രോസിക്യൂഷനെ വിവരം അറിയിക്കുകയും കേസ് രജിസ്റ്റർ ചെയ്ത് മൃതദേഹം ഫോറൻസിക് പരിശോധനയ്ക്കായി കൈമാറുകയും ചെയ്തു. സ്ത്രീയുടെ മരണത്തിലേക്ക് നയിച്ച സാഹചര്യങ്ങൾ കണ്ടെത്താൻ ക്രിമിനൽ ഇൻവെസ്റ്റിഗേഷൻ വിഭാഗത്തിന് ചുമതല നൽകി.
രണ്ടാമത്തെ സംഭവം അൽ-നഹ്ദയിലാണ് റിപ്പോർട്ട് ചെയ്തത്. 1999ൽ ജനിച്ച മറ്റൊരു ശ്രീലങ്കൻ സ്ത്രീയുടെ മൃതദേഹമാണ് ഇവിടെ കണ്ടെത്തിയത്. സംഭവത്തെക്കുറിച്ച് 1989ൽ ജനിച്ച കുവൈത്ത് പൗരനാണ് ഓപ്പറേഷൻ റൂമിൽ വിവരം അറിയിച്ചത്.
തുടർന്ന് ജഹ്റ പബ്ലിക് പ്രോസിക്യൂഷന്റെ നിർദേശപ്രകാരം മൃതദേഹം ഫോറൻസിക് വിഭാഗത്തിന് കൈമാറി. മരണകാരണം കണ്ടെത്തുന്നതിനും സംഭവവുമായി ബന്ധപ്പെട്ട സാഹചര്യങ്ങൾ വ്യക്തമാക്കുന്നതിനുമുള്ള നടപടികൾ പുരോഗമിക്കുകയാണ്.
രണ്ട് സംഭവങ്ങളിലും മരണകാരണം സംബന്ധിച്ച ഔദ്യോഗിക വിവരങ്ങൾ പുറത്തുവന്നിട്ടില്ല. അന്വേഷണം പൂർത്തിയായ ശേഷമേ മരണങ്ങളുടെ യഥാർഥ സാഹചര്യം വ്യക്തമാകൂ.
